ගෝපාල් ක්‍රිෂ්ණ ගාන්ධි යනු මහත්මා ගාන්ධිගේ මුණුපුරාය. දැන් ඉන්දියාවේ අගමැති වන මෝදි මැතිවරණය දිනා දිව්රුම් දෙන්නට පෙර ගාන්ධි මෝදිට විවෘත ලිපියක් ලිව්වේය. එය හින්දු පුවත්පතේ පළ විය. අලංකාර ඉංග්‍රීසියෙන් ලියූ ඒ ලිපිය සම්පූර්ණයෙන් පරිවර්තනය කරන්නට මෙහි අවකාශ නැත. එහි එන කරුණු කීපයක් හෙමින්සැරේ කියවමු.
ගාන්ධි මෙසේ අරඹයි: මා මේ ලියන්නේ හෘදයාංගම සුබ පැතුම් සමග යැයි කියන්නේ අවංකවම. එසේ අවංකව සුබපැතීම යනු මට පහසු කටයුත්තක් නොවේ. මන්දයත් ඔබ ඉන්දියාවේ ඉහළම පුටුවට යනු දැකීමට මට කිසිම අවශ්‍යතාවත් තිබුණේ නැති බැවිනි. ඔබ අගමැතිවරයා වීම ගැන මිලියන ගණන් ජනයා ප්‍රීතියෙන් ප්‍රමෝදවන අතර තවත් මිලියන ගණන් ජනයා ඒ ගැන ගැඹුරු සේ කනස්සල්ලට පත් වන ඔබද දන්නා බව මම දනිමි.
ඉන්දියාවේ අගමැති පුටුවේ වාඩිවීම වැනි දුර්ලභ වරප්‍රසාදයකට ඔබ වැන්නෙකු සුදුසුකම් ලැබීම ගැන මගේ කණස්සල්ල තිබියදීත් අවවරප්‍රසාදිත ප්‍රජාවකින් හා පවුලකින් පැමිණි ඔබ මේ තනතුරට පත්වීම ගැන මම ගෞරවය පුද කරමි. ඔබේ මෙම පත්වීම නිසා සාක්ෂාත් වන්නේ ඉන්දියාවේ සමානාත්මවාදී ව්‍යස්ථාවේ දැක්මයි.
එසේ ලිපිය අරඹන ගාන්ධි 69% ජනයා මෝදිට ඡන්දය නොදුන්නේ මන්දැයි මතක් කර දෙයි. සියයට 69 ඉන්දියානුවන් මෝදි යනු දේශයේ ආරක්ෂකයා යැයි නොදුටු බව ගාන්ධි මෝදිට මතක් කර දෙයි.
ඒ නිසා ඉන්දියානු ආණඩුක්‍රම ව්‍යවස්ථාවෙහි නිරූපිත “දේශය” නම් සංකල්පය නැවත පරීක්ෂා කරන්නැයි මහත්මා ගාන්ධිගේ මුණුපුරා මෝදිගෙන් ඉල්ලා සිටියි.
ඉන්දියාව හින්දු දේශයකියි විශ්වාස කරන ජාතිකවාදියෙකු වන මෝදිට ආණ්ඩුක්‍රම ව්‍යවස්වාවේ නිරූපිත
“දේශය” නම් සංකල්පය යළි පරීක්ෂා කරන්නැයි කියන්නේ ඇයි? නූතන ඉන්දියාව බිහි කිරීමේ වැදගත් පීතෘවරයෙකු වන සර්දා වී පටෙල්ගේ ප්‍රධානත්වයෙන් වූ කමිටුවකින් ඉන්දියාවේ සුළුජාතින්ගේ ආරක්ෂාව ව්‍යවස්ථා ගත කරන්නට වග බලාගත්තේය. එනම් ඉන්දියාව යනු හින්දුන්ගේ රටක් පමණක් නොවන බව නීතියෙහිම ලිව්වේය. ව්‍යවස්ථාවේ එන ඒ දැක්ම සමග සෙල්ලම් කරන්නට නොයා එය තමන් වෙතට සම්පූර්ණයෙන්ම උකහාගන්නා සේ ගාන්ධි ඉල්ලා සිටියි. මේ වූකලි හින්දු ජාතිකවාදී මෝදිටත් ඔහුගේ අනුගාමිකයන්ට ඉන්දියාවේ ලෞකික ව්‍යවස්ථාව විසින් එල්ල කරන ලද අභියෝගයකි.
ගාන්ධි මෙසේ කියයි: “සංවර්ධනය යනු ආරක්ෂාවට ආදේශකයක් නොවේ.” මේ වූකලි අපේ රටේ ලොක්කන්ටත් පණිවිඩයකි. ආණ්ඩුවේ උතුරු වසන්තය අතහැර තාමත් පළා යන දෙමළ ජනයා සිටින බව පසුගිය සතියේ ලිව්වේ ඒකය. දූෂිත ආණ්ඩුවක් සංවර්ධනයේ නාමයෙන් කරන මහාපරිමාණ වැඩවලින් උඩ සිට පහළටම බෙදා ගත හැකි විශාල කොමිස් කුට්ටි ලැබෙන නිසා සංවර්ධනයෙන් ඔක්කොම හරි යන බව කියන කුලී කටකාරයන් රෑන් පිටින් හීලෑ කර ගන්නට හැකිය. එහෙත් සංවර්ධනය යැයි හැඳින්වෙන දේ මගින් මිනිසාගේ ආරක්ෂාව සහ චිරජීවනය පිළිබඳ හැඟීම ඉබේම තහවුරු වන්නේ නැත. සුළුජාතිකයන් සම්බන්ධයෙන් මෙය වඩාත් අදාළය. ඒ නිසා සුළුජාතිකයන්ගේ ආරක්ෂාව, චිරජීවනය හා පිළිගැනීම පිළිබඳ කතිකාව ඊනියා සංවර්ධනයෙන් වෙන් කොට වර්ධනය කළ යුත්තකි. ආර්ථික සංවර්ධනයෙන් ඔක්කොම හරි යන්නේ යැයි කියන ජාතිකවාදී නායකයෙකුට ගෝපාල් ක්‍රිෂ්ණ ගාන්ධි ලියුමක් ලියන්නේ ඒකය.
එක් අතකින් කුරාණයත් අනික් අතින් ලැප්ටොප් එකත් ගත් මුස්ලිම්වරුන් ගැන මෝදි මැතිවරණ රැළිවල කතා කළේය. එමගින් ඔහු කීවේ ඉන්දියානු මුස්ලිම්වරුන් වෙත තමා සංවර්ධනය ගෙන එන බවය. මේ කියමන සිහිපත් කරන ගාන්ධි මෙවැන්නක් කියයි: ඒ සංවර්ධනය පිළිබඳ ප්‍රකාශය මුස්ලිම්වරුන් තුළ විශ්වාසය ඇති නොකළේ මහාභාරතයේ හෝ රාමායණයේ අලුත්ම ඩීවීඩී එක එක් අතකිනුත් අනිත් අතින් හිංසක ත්‍රිශූලයත් ගත් හින්දු අන්තවාදියාද මෝදිගේ ජාතිකවාදය විසින් නිර්මාණය කර ඇති නිසාය.
ගාන්ධිගේ ලිපියේ වැඩි කොටසක් වැය වන්නේ ඉන්දියාවේ සියලු සුළුජාතිකයින්ගේ ආරක්ෂාව තහවුරු කිරීම නව අගමැතිවරයාට ආණ්ඩුක්‍රම ව්‍යවස්ථාවෙන් පැවරෙන වගකීම බව මතක් කර දෙන්නටය. ඇතැම් ප්‍රාන්තවල හා ප්‍රදේශවල සුළුජාතිකයන් වන්නේ හින්දුන් විය හැකිය. ඒ අයගේ පවා ආරක්ෂාව තහවුරු කළ හැක්කේ ස්වෝත්තමවාදීද ජාතිවාදීද වූ අලංකාරික කියමන්වලින් නොවේ. නීතියේ ආධිපත්‍ය ඇති කිරීමෙනි.
සැබවින්ම පැන නගින ගැටුම් ඇත. අන්තවාදීන් විසින් සැලසුම් කර අවුස්සන ගැටුම් ඇත. මේවා කොයියම් මෙහොතක හෝ ඇතිවේය යන භීතියෙන් සිටින සියලු දෙනා බියෙන් මිදවීම කළ හැක්කේ ආණ්ඩුක්‍රම ව්‍යවස්ථාව ප්‍රධාන නීතියේ ආධිපත්‍ය ඇති කිරීමෙන් බව ගාන්ධි කියයි. විශේෂයෙන්ම මෙවැනි හිංසක ක්‍රියාවලින් පීඩාවට පත්වන ස්ත්‍රීන්ගේ ආරක්ෂාව සැලසීම නව අගමැතිට බාරය.
බහුවිධභාවයේ රටක් වන ඉන්දියාවේ ඒකීය සංස්කෘතියක් පිළිබඳ වාගාලාප භාවිත නොකරන ලෙස ගාන්ධි ඉල්ලා සිටින්නේ ඇයි? එක තනි සංස්කෘතියක් පිළිබඳ වාගාලාපවලින් ඇවිස්සෙන්නේ බහුතරයට අන්තවාදීන් වන නිසාය. මේ වූකලී අපද හෙමින්සැරේ සිතා බැලිය යුත්තකි. පාරට බැස ගෙවල් ගිනි තියන සිංහල අන්තවාදී මැරයන් බිහිවීම පිළිබඳ වගකීම ජාතිය, ජාතිකත්වය, ජාතික චින්තනය ආදිය පමණක්ම මිනිසාට ඇති එකම සරණය යැයි සිතා වහසි බස් බිණූ කා අතරත් බෙදී යයි. ආගමික අනන්‍යතාව මුස්ලිම් මිනිසාගේ එකම සරණය යැයි සිතූ මුස්ලිම් ජාතිකවාදියාත් මීට වගකිව යුතුය.
මෝදිගේ චින්තනමය මස්සිනාලා අපේ රට කරවති. ඇත්තටම එයාලා මෝදිගේ බාප්පලාගේ පුතාලා තරම් ඔහුට සමානයහ. අනේ ඔවුන් දිනපු දා මෙවැනි ලියුමක් යවන්නට ගෝපාල් ක්‍රිෂ්ණ ගාන්ධි වැනි කෙනෙක් අපට නොසිටියේය.
(2014 ජූනි 22 ඇත්ත පුවත්පත)
No comments:
Post a Comment